Home Minister Thu sawi kha…

by ZOaTlau Source : Misual.com

Zarzokima, Bungthuam khua Tuikukin an that tih thawm kha Evening Post chanchinbu kan khawih lai zing lam dar 10.00 vel bawrah kan dawng hman a. Chu chu November ni 13 (Zirtawpni), 2009 a ni. Bru Revolutionary Army nia inchhal ten Zarzokima an kahhlum hun hi zing lam dar kaw pelh a ni.

Zirtawpni zinga thil thleng a ni a, Zirtawp zanah Tuikuk in a kang tan a, Inrinni thlengin an la hal a ni. Hemi chungchangah hian home minister R Lalzirliana chuan police lamte chu gear neuh neuh ken ngai an nih avangin duh angin a hmun an thleng chak tawk thei lo niin November ni 15 (Pathianni)-a press conference a kohah a sawi.

November ni 13 chawhma lama thil thleng chu a ni a, mipui thinurin Tuikuk in an hal nghal a, November ni 14 zan thlengin Tuikuk in hi la hal chhunzawm zel a ni. MZP chuan November ni 13-a thil thleng hi a ni la la hian an ngaihtuah nghal a, chawhnu lamah chhuakin Mamit-a an khawtawi hnuah zanlaiah Bungthuam hi an thleng hman a ni. Bungthuam hi Tripura ram dep tak tak a ni.

In hal tihte hi a tam zawk chu home lam hian an venghim hman tura ngaih a ni a, mahse November ni 14 zan thleng khan West Bunghmunah chuan Tuikuk in zalen takin an la hal thei thung.

West Bunghmuna zirtirtu hnathawk kan thianpa chu a awm lai a ni a, “In hal tur hi dan tumna vak a awm lo a niang, Inrinni zante khan kan awmna khua hi an la rawn hal, Pathianni khan rei lote police chuan an rawn tlawh a, engmah record pawh an la lo, dan an tum lo niin ka hria,” tiin November ni 16 tuk khan min rawn hrilh.

Home minister ber hian November ni 13-a thil a thlen hnu khan chanchinthar lakhawmthute hmaah “Tharum hmanga min beitute chu tharum vekin thungrulh an ni ang,” tiin a sawi a nih kha. Kha a thusawi kha November ni 14 Mizoram chanchinbu hrang hrang headline a ni, November ni 13 zan pawh khan he chanchinthar hi cable tv news-ah puan a ni bawk.

Home minister hian a cho chhuak ni berin kei chuan ka hmu, kha a thusawi kha home minister sawi tur a ni chiah em tih a ni, a sawifiah zui leh si lo. Tuikuk hian home minister thusawi kha Mizo tawngin let nghe nghe se, sawrkar laipuiah kalpui ngat se lakkir tumtu thusawi atang hian buai zual zel bak hmabak a awm lo.

November ni 16 (Pathianni) khan November ni 13-a a thusawi khi tlip leh teh a’n tum a, Tuikuk tihsual nei lo khawih tumtute khawih loh tur, a khawih tumtute chu police hnenah firing order pek reng an ni tih lam hawiin a’n sawi leh ta a ni.

Mizorama cheng Tuikuk in hal hian eng rahtha mah a thlen lo a, Mizote hmel a tichhe mai mai a ni. Home minister hian phuba lak nana hun a pe a nih chuan ram roreltu ni tlakah kei chuan ka ngai lo. Kan kutthak kan hiah vak vak hian nakin zelah harsatna min thlen lian zawk a ni. He issue hi fing taka tihfel a tul hle a ni.

Kum 1997 (Congress ministry hmasa hun tawp) khan Tuikuk-te chu Mizoram atangin umchhuah an ni a, an rawn kir theih nan hmalakna sawrkar nen nei chho char charin dawhkan tum 13 lai Mizoram sawrkar leh Tuikuk hian an kilho hman a ni. Tun hnai hian a hmawr an bawk tep tawh a, Tripura-ah hian Tuikuk raltlan hi 30000 chuang an awm angin an insawi a, record erawh chiang fekfawka sawi theih a ni rih lo. Heng raltlante Mizorama an rawn kir hian sawrkar laipuiin an inbenbel nan sum pek a tum a, Mizoram sawrkarin hlawm khata an chen an rem ti lo a, an awmna ngaiah an insemdarh leh tur a ni an ti. Tuikuk lam hian a hlawma awm khawmte an duh a ni.

Tuikuk hi an rawn kir leha hlawm khata an awm chuan Mizoram politics thlengin nghawng an nei dawn tihna a ni. Chu chu an tum ram pawh niin a lang, chumi chu Mizoram sawrkar hian a hre ve tho a, semdarh hi a tum ve thung. Tun ang dinhmuna rawn kir duh lotute chuan hma an la ta a, an kir lohna tur, sawrkar laipuiin an nawr luih lohna turin hma an la ni ta berin a lang.

Mizo culture-a in assimilate an hlau a, political influence neih an tum tel bawk niin tun dinhmunah chuan a lang. Amaherawhchu Scheduled Tribes and Traditional Forest Dwellers (Recognition of Forest Rights) Act tlawhchhan a nih ngawt loh chuan Mizoramah hian Tuikuk hian ram rawn ‘claim’ theihna chu an nei hauh lo. Heti chung hian Mizoram sawrkar chu an chaih hneh hle si a ni…

Rihdil kal haw Bus a chesual

Pine Mount School Aizawl Rihdil kal haw chuanna Bus Khawzawl bulah a chesual a, zirlai 1 a thi a, engemawzatin hliam an tuar. Pine Mount School a Geography Department Pawl 12 zirlai Field Trip a kalte chuan Rihdil an tlawh a, an rawn haw lam vawiin chhun khan Khawzawl atanga 9 Km vela a hla Khuailui bulah Bus pahnih zinga hmeichhe naupang chuanna zawk City Ride Bus MZ 01 4487, Pu Hrangdailova, Armed veng South ami motor chu kawngthlangah a tlanliam.

Soni Biakhmingsangi D/o. Zorambuaia Cheural, Lawngtlai Dist ami, tuna Aizawl Tuikual venga khawsa chu Khawzawl Damdawiin panpui anih laiin a boral. Bus ah hian mi 15 an chuang a, Hliamte chu Khawzawl damdawiin panpui an ni a.

Hriat theih chinah hliamte chu Lalnuntluangi Chawlhhmun, Lalfakawmi Sairang, Laltanpuii Armed veng ‘S’,  Jenny Thlako Saiha Vengpui, VL Tluangi Dinthar, Lalrinkimi Tuikual, Rita Lalrinengi Dinthar, Evelyn Darthangpuii Dinthar, Lalrinzuali Lengpui, Vanlalzahawmi Tuikual, Lalhruaitluanga (Zirtirtu) Khawzawl Electric veng, Rothangliana Ralte (Zirtirtu) Saron veng, Lalthlenmawia (Driver) Armed veng ‘S’ leh Lalkhenga Armed veng South te an ni a, a tam zawk hi chu hliam na lem lo an niin first aid peka chhuahtir an ni a, pahnih na zual deuh an awm. Soni Biakhmingsangi ruang hi Khawzawl Damdawiinah vawiin tlai khan post mortem a ni.

Bus hi ft 150 atanga 200 vel a lum nia hriat a ni a, a chetsual chhan hi he thu buatsaih lai hian hriat a ni rih lo.

ZAMZO AWARD HLAN

Aizawl khawpui hmun hrang hranga puipunna hmun office, thingpui dawr leh damdawiin atanga meizuk khu awm tlemna ber hmuna ngaih Directorate of Industries chuan Zamzo Award a dawng.

 

 

Mizoram State Tobacco Society leh Indian Society on Tobacco and Health Mizoram Chapter ten an buatsaih meizuk tlemna hmun thlanchhuahna hi tunlai thiamna changkang tak Air Quality Monitoring hmanga teh a ni a. He hmanrua hi USA Washington atanga Tobacco Control Society ten an hman hawh a ni. He tehna hmang hian meizuk khu tamna ber pawh hmuhchhuah niin Dirty Ashtray Award pek tur a ni a. A dawngtu erawh chu thup rih a ni.

 

Award hlanna inkhawm hi Dr. Lalbiakkima, Medical Superintendent, Civil Hospital in a kaihruai a. Khuallian Chief Secretary Pu Vanhela Pachuau chuan zuk leh hmuam that loh zia leh mihring hriselna atana pawi a khawih thui zia hi tam lua awm lova inzirtir a tul tak zet tawh a ni a ti. Chief Secretary chuan Kohhran atangte tlawmngai pawl leh sorkar hnathawkah te pawh he thil chin tha lo tak hi uar zela inzirtir a tul a ni tiin khuahkhirhna dan awm mekte pawh chak lehzuala kenkawh a duh thu a tarlang a. Aizawl khawpui daihnaia tuibur thlawrna hmunte pawh a thianghlim loh zia mipui mimirin an hriatchian leh zawk theih nan an thlate laka local TV hmanga thehdarh tul a tih thu leh mizote thil chin tha lo tak Khaini siamna hmunpuia an sawngbawl dan zawng zawngte pawh thlalak theih nise chu chuan a hmuam thinte lakah zirtirna tha tak a pek theih a beisei thu a tarlang a ni. Kristian thurinah pawh thianghlim tura beisei mihringte hian rilru thlarau leh taksa kan vawn thianghlim hi kan tih tur hmasa ber a ni fovang a ti bawk.

IST&H Mizoram Chapter President Pi Lal Riliani pawhin thusawiin kum 20 hmalam atanga mitlawmngai tlemte in an din IST&H chuan sorkar leh mipui thawpna a hmuh zel avanga a lawmthu a sawi a. Zamzo Award hming phuah chhan tarlangin he pangpar hi mizote zinga pangpar kumhlun leh upa tak, pi pu ten thlam bulhnaia an chin thin ramhuai leh thlarau sual umbo thei nia an ngaih thin anih avangin tunlai khawvela hmelma lian ber pakhat zuk leh hmuam do kawngah a hming puttir a ni a ti. Zuk leh hmuam that loh zia hre thar zela a laka inveng tura tanlak puiah mizo mipuite a sawm a ni.

Zozam Award hi Khuallian Pu Vanhela Pachuau hian a dawngtute hnenah Citation nen a

hlan a ni.

NATIONAL EDUCATION DAY

Wednesday, 11 November 2009

Vawiin khan ICFAI University chuan National Education Day pualin I & PR Auditorium, Treasury Square, Aizawl ah program an hmang. He program hi Union Education Minister of India hmasa ber Pu Maulana Abdul Kalam Azad, Freedom Fighter nibawk piancham kum 121 zulzuia hman a ni a. He hunah hian zirlaite atangin Elocution competition neih a ni a, a thupui atan chuan ‘Education in Mizoram – Vision for 2020’ tih a ni. Prof. C.Lalkima, Joint Registrar chuan Welcome Speech neiin, Dr. L.N.Tluanga, Member, Board of Governors, ICFAI University Mizoram chuan intihsiakna a telte hnenah lawmman semna hun a nei a, Pu Samuel Lalnunzira, Centre Head chuan lawmthu sawina hun a nei bawk. Program hi kalkhawm ten India National Anthem a ruala sakna hun neiin an titawp a ni. ICFAI University Mizoram hi Management zirna lam thlurbikna hmun a ni a, Mizoram State Assembly in Act siamin kum 2006 khan din a ni a, BBA, BCA, BHTM leh MBA te zirin zirlai engemaw zatin hun an hmang mek a ni.

Home Minister-in Hriatpui Lo

Tripura Camp-a Mizoram Bru Refugee-te lak let chu tun thla chawhnu lam hian tan theih beisei a ni tih tunhnaia inbiaknaah sawilan a ni a, hetih laiin Home Minister R. Lalzirliana chuan he inbiakna hi a hriatpui lo tih thudawnna a hrilh.Niminpiah khan Home Secretary Lalmalsawma Office-ah Mizoram sorkar aiawh, Home Ministry aiawh leh Bru refugee aiawhten an sawihova, Mizoram sorkar aiawhin Home Secretary Lalmalsawma leh Home Department-a officer dangte an tel a, Central Home Ministry aiawhin Director, RR Jha an tel a. Bru refugee aiawhte chu Sriromani, Elvis Chorki, Bruno Meska, A. Sawibunga leh Dawngliana-te an ni.

Tripura atanga Mizoram Bru lak let turte dahna tur hmun, Mizoram sorkarin a ruahmanna ‘Road Map’ chu pawm tlan a ni a, amaherawhchu a tak taka thiltih hunah erawh chuan thil thenkhat tihdanglam hret hret ngai a awm thei dawn tih hriat a ni.

Tripura Camp atanga Bru refugee-te hi lak let leh nan hian Central sorkar atangin cheng nuai 2,586 dil a ni a, hei hi Central sorkar chuan a thuphungin a remti tawh a ni.

 

Isua nge i thlan dawn Baraba?

Source : Serchhip Times :

Tunlai khawvel in a kan hun tawng mek, kan sik leh sa boruak hrehawm tawh zia te, kan khawvel nitin chanchinthar hriat thin te, ringtu nuna harsatna hrang hrang kan tawh te hi han thlir kual teh? Enge i hmuhchhuah le? Tunlai khawvel huntawng mek thlir a thil lo lang chiang tak mai chu hei hi a ni. Khawvel hi a chakna te chawpin a boral mek a ni tih hi. He khawvela mihring te hi tumah dam hlen tur kan awm lo. Mitin chunga thleng tur thihna hi kan hmachhawn vek dawn a ni. Chu thihna min min nan hunah chuan he khawvel a kan khualzin kawng zawng zawng hi Chatuan atan a tawp tawh ang. He khawvel hi la thlahlel engang mah ila, awmzia a awm chuang tawh lovang. Kan sum leh pai leh kan ropuina zawng zawng te pawh hi engmahlo mai a ni tawh ang. Chutih hunah chuan mihring te hian duthlan tur kawng hnih chiah kan nei – Vanram leh hremhmun; Chatuana nunna leh chatuana boralna. Vanram chu chatuana hmangaihna par vulna hmun a ni a, hmangaihtu te leh hmangaih te in tawhkhawmna hmun, chatuana lungngaihna leh tahna awm tawh lohna hmun a ni. Hremhmun erawh chu chatuana boralna, tah leh ha thialna hmun. Thil sual leh chhia tinreng fuankhawmna hmun rapthlak a ni.

Ringtute hian vawiinah hian he kawng pahnih zawh turah hian khawi kawng nge kan zawh mek kan inchhut ngai em? Vanram kawng hi kan zawhlo anih chuan duhlo chung chung pawhin hremhmun kawng hi kan zawh tho tho dawn. I in ngaihtuah chiang ang u. Pathian kan hria, Isua pawh kan hria, a rawng kan bawl a, kan inkhawm a, Pathian fakin kan zai a. Mahse he kan kawng zawh danin Lal Isua duh dan a ni em? A thu hria a zawmtu te nge kan nih a, a thu chu hria a zawm silo te? Tuna kan awmdanah hian kan thla a muang tawk em le? I kawng zawh lai kha chhut nawn leh rawh.

Lal Isua chuan a lalna ram ropui kalsanin he khawvel a mihring suala tang mek te tlan turin a nun a rawn hlan a. A inpekna ropui zia leh tlawm thlak zia hi kan ngaihtuah ngai em? Chutah he khawvel a a awm chhung zawng khan hmuhzit leh endawng, sawichhiat leh tihduhdah a la tuar zui leh nghal. Mahse chuti chung chuan Lei leh Van lal a ni a, nakinah hun tawp a thlen hunah a Lalthutphah chunga thuin mitinin an la hmu dawn, amah sawisa tute leh thing a khengbettu te ngei ngei pawh khan. He khawvel a a awm chhung khan tlawmin hmuhsitna leh sawichhiatna tinreng tuar mahse, Chatuan lal a ni dawn a, chatuanin ro a la rel ang.

Juda mipui te chuan Lal Isua aiin Baraba an thlang a, chu an duhthlanna rah ngei chu an tel mek. Khawvel a hnam sawisak nasat ber, indona hmachhawn tam ber leh ram buai ber an nih phah. Lal Isua an khenbeh atang khan tun thlengin a thenawm ram te itsik leh run an la tawk reng. An khawpui suasam a ni a, a ram mipui mi maktaduai ruk lai Hitlera’n a rawt sak bawk. Tun thleng chuan khawvela ram ralmuang lo ber pakhat a la ni.

Vawiin hian kan duhthlan tur neihah hian tu zawk nge kan thlan dawn le- Lal Isua nge Baraba? Tu rawng nge kan bawl dawn – Lal Isua nge Baraba? Khawi kawng nge kan zawh mek hi – Chatuan nunna leh Boralna?

LAL ISUA NGE BARABA
- Upa T.Romama, Serchhip

I khualzin kawng hi a tawp hunin
Khawnge I hawn ang le?
I hawna tur hmun khat chauh a awm a,
I in hrechiang em le?
I duhthlan tur kawng hnih chauh a awm a,
Chatuana nunna leh boralna.

Hun tawp a la thleng ang nakinah,
Chutih hun chuan khawiah nge I awm ang
Duthlang rawh le, tunge i duh zawk le
Lal Isua nge Baraba?

A lalna ram ropui kalsanin
A nun a hlan ta a.
Aw a riangin a tlawm lua em a ni,
Aw ka sawi seng lo ve.
Khawvelah hian tlawmin rethei mahse
Chatuanin ro a la rel dawn si.

Kei zawng ka thlang ka lal ber atan
Ka phatsan tawh lovang.
Ka damlaini kawlah liam mah sela
Ka thla a nung reng ang.
A rawng ka bawl zel ang ka theih tawpin,
Baraba aiin ka thlang zawk e.

Ni tina insiamthar

(Pathian hruaina leh Rawngbawltu nun)
Joshua 3:14-16, Rom 15:1-3, II Tim. 4:5, II Thessalonika 1:11

Pathian Hruaina
Pathian hruaina han tih mai hian kawng tam takin sawi dan a awm awm e. Chu Pathian hruaina ah chuan a mi hruaite a zilhhauna emaw, a malsawmna emaw te pawh a leng vek thei awm e.

Mihring ten kan nun kan hman chhohna kawngah hian kan hun tawng leh kan thil tih, kan kalna kawng reng reng hi hunin a rawn her chhuahpui pangai angah kan ngai liam mai \hin. Heng kan hun tawng leh thil lo thlengte hi hunin a rawn herchhuahpui ve mai ni lovin Pathianin kan tan a kawng ruat, kan kalna tura a lo ruahman sa vek a ni a.  John Calvin-a Theology-a Ruatlawk Theology an tih \hin ang deuh te pawh khan a sawi theih awm e.

Pathian hian kan lo pian chhuah a\ang a, kan thihni thleng hian kan awm dan tur hi a lo rel fel vek a, kal kalna tur kawng te a lo ruat lawk vek \hin a ni. He thu hi mi tam tak chuan pawm har a n ti a, ruat lawk theology hi an pawm thlap thei \hin lo. Amaherawhchu, he ruatlawk, kawng ruahmansa-ah hian tumah kan peng bo thei lo a, a sawitu ngei pawh hian Pathian hruaina kawng hi nasa takin ka lo zawh tawh a. Mahse, chu a mi hruaina a\ang chuan peng bo \hinin, a thununna leh a vuakna pawh ka lo tuar ve hle tawh \hin a. Chumi avang chuan tunah in hmaah ka lo ding thei a ni. Hetiang dinhmun thleng tur hian Pathianin a vuak kher nih tum tur tihna erawh chu a ni hauh lo. Khawchhak miffing ten an hruaitu Arsi en lovin, an rinthua Lal thar lo piang tur chu he khawvel lal ina awm ngei tura an rin avanga an pensan khan, a pianna hmun ni loah, khawvel Lal inah an lut a, chu chuan nasa takin thil \ha lo a hring ta tih kan hria. Nausen rawt hial a thlen phah a nih kha. Chu vang chuan kan kalna kawngah hian kan hriatu Arsi, kan Pathian hi kan rawn a, amah thlir a, a remruatna kawnga kal thiam thei turin nitin zan tina amah kan rawn a ngai a, chu amah nena kan inbiak pawhna hmanrua chu |awng\ai hi a ni.

Tichuan, Pathian hruaia awm tur chuan enge kan tih tak ang, Pathian hruai chuan lo awm tai la, enge kan tan hlawkna ni ang ?

Pathian hruaia awm tur chuan a hruai theih ni tura kan nun kan hlan a pawimawh. Kan nun kan hlan a, a hruai theih tura kan inpek phawt chuan kan kiangah awmin min chanchilh tlat ang a, atana thawk turin min hruai ngei ang.

Tin, chu mai a ni lo, Pathian hruaia awm te ni hlawhna chu  Rom 8:14 -ah  Pathian Thlarau hruaia awm apiangte chu Pathian fate an ni si a tih kan hmu a ni. Pathian fa nih baka thil thlakhleh awm hi a awm thei dawn em ni? Chuvangin, Pathian thlarau hruaia awm thei tur chuan a hnena kan inhlan a \ul a, chumi ni tur chuan ni tina kan nun kan inhlan thar zel a \ul a ni.

Rawngbawltu nun :
A sawitu en chuan sawi ve ngam tur pawh niin min hre lo ang, keimah ngei pawhin sawi ve tlakah ka inngai lem lo. Amaherawhchu, tun hun min hruai thleng a, tling lo leh tlak loa inngai chung pawha he dinhmun min hruaithleng tu hian a sawituin ka lo insiam \hat theih nan leh a ngaithlatute ah pawh nunga a thawh theih nan sawi a \ul a ti a ni ang e. Mihlim \awng takin A lan dan  ang zelin sawi kan tum ve dawn a ni.

Rawngbawltu han tih hian a awmzia kan hrethiam nghal mai awm e. Tunlaiah mi kan khawsak a sang tawh a, mi tam takin awmpui kan nei fer fur tawh a, chung kan awmpui te chuan kan ei turin rawng min bawlsak \hin a. Tin, awmpui nei kher lo pawhin rawng kan bawl chuan mi tan ei tur kan siamsak \hin a ni.

Hei hian rawngbawltu nun chu a hrilhfiah chiang ber awm e. Rawngbawltu kan nih chuan lo awm mai mai a, lo ei ve ngawt tu chu kan ni lo phawt mai a, chuvang chuan Kohhran leh |halaiah (\halai angah ni lovin) rawngbawltu kan nih chuan mi ei tur Pathian thu kan chhawp chhuah sak tur a ni. Tin, mi ei theih turin kan nun kan buatsaih tur a ni. Rawngbawltu mi ei loh nih hi a hlauhawm khawp mai. Mite ei theih nun chhawp chhuahsaktu Rawngbawltu ni turin zanin a\ang hian i in buatsaih thar leh \heuh ang u.

Pathianin kohna chi hrang hrang hmangin min ko a. A \hen chu hruaitu ni tur te, a \hen chu member ni tur te, a \hen chu zai tur te, a \hen thusawi tur te, a \hen thawhlawm khawn leh chutiang zelin, kohhrana kan rawngbawlna ah hian Pathian hian a kohhran ho leh \halaite kaltlang hian kawng chi hrang hrangin min ko \hin. Chumi hrethiam a, pawm thiam thei tur chuan a kotu Pathian kan rin ngam a \ul tak zet a.

Kan châk zawng leh kan nih duhna lamah min ko lo a ni mai thei, tin, min kohna zawng zawng pawh chhan har kan ti a ni mai thei a. Chung zawng zawngah chuan Min kotu hian eng vanga kei min ko nge a nih tih kan ngaihtuah a ngai.

Mahni nun kan en a, a \hen chuan tling lo kan inti a, kan nun kan chhui kir a, a rawngbawl turin tling kan inti lo a, tlak kan inti bawk \hin lo. Mahse, kan tlinlohna leh kan fel lohna te, mi tlak tlai lo kan nihna zawng zawng chu Kross-ah min lo khen beh sak vek tawh a, chu kross avanga thihna ata nunna lo lang chhuakta chuan nang leh kei, pian tirh ata thiang hlimna leh tlinna reng reng nei lo hi tlingah min lo puang ta a, a rawngbawl tlak ve tawh lo kha a rawngbawl turin min ko ta a, a ropui ngawt mai.

Mihring nunah kan in teh a, mahni mai ni lovin midang te thleng pawhin kan teh \hin. Tlinna kan inhmuh sak thei lo a, \hatna lai kan inhmuhsak thei lo a, chuvang chuan kan teha te nun khan min vaw chau a, kan rinna a lo der thawn phah \hin. Hei vang hian mi tam tak chuan Kohhran ah leh |halaiah kan in hman duh loh phah \hin. Hei hi kan tih loh tawp tur a ni.

Kha mi, a nun hlui ka va chhui sak vak vak, a nun ka va teh vaka kha Kan Lalpa hian a nun hlui a chhui kir sakin, a thil lo tihsual tawh te a hriat reng sak miah lo. A nunhlui sima, a lam hawia a tana mi a inpek phawt chuan, Kan Pathian hian, “A nunhlui liamtaah a lo sual \hin em avangin hei chu ka rawngbawltu ni turin a tlak lo” a ni a ti ngai lo a, “An sualna leh atna te chu ka hre reng tawh lo ang, an tan ka fapa a thi si” a lo ti zawk a ni.

Chuvang chuan, mi nun ka va teh khan ka thlarau nunah hlawkna min pe em, Kan Lalpa ka rinna kawngah enge ka tan \angkaina awm tih ngaihtuah ila, mi nunah eitur kan hmuh phahna tur a nih loh chuan mi kan va teh hi enge maw a \ulna leh, mi nunhlui kan chhui kir sak vak vak hian enge hlawkna kan hmuh, kan teha te khan rinawm taka Pathian rawng an lo bawl tawh a nih phei chuan keimahni kan in ti hla mai mai a,  chuvang chuan, kan Asst. Leader-in a lo sawi tawh \hin angin, kan tun hun zel hi a pawimawh a, tun dinhmuna kan nihna hi kan inpawmsak tlan apawimawh, chu chuan nasa takin kan rawngbawl honaah pawh hlawkna min pe ngei ang.

Heng kan han sawi tak zawng zawng atang hian enge kan tih tur ni ta ang le ?

Kan chunga thil lo thleng reng reng te, rawngbawl tura kohna kan dawn te, chanvo nei tur kan ni lem lo a nih pawhin, engkimah pathiana inghat tlat zel a, a lo ni tak e Lalpa, nangmahah chauh ka rinna ka ngaht a, I mi hruaina hre thiam thei turin chaknain min thuam thar zel ang che tia nitin kan nun kan hlan thar zel hi a pawimawh hle a ni.

Chu nun, ni tina in hlan thar nun kan lo neih chuan, Tirhkoh Paula’n nitin ka thi \hin a tih ang khan nitin sual tlan sanin, thil \ha lo leh thlemna lakah kan lo thi ang a, kan khawvel nun sualte kan thihsan thei ngei ang.

Tichuan, nitina sual laka kan thih miau chuan Ni tinin siam tharin kan lo awm ang a, ni tina siam thara awm te nunah chuan, tihngaihna kan hriat loh, eng tin nge kan hnuh hnaiah ang tia kan buai kan buaina kan \halaipuite hian ei tur, chaw tak chu an lo hmu ang a, kan thawh ve tel miah loin, Krista ropuina leh thiltihtheihna chuan min hruaikhawm sak tawh dawn a ni. Chutiang taka awm thei tur chuan Kan thlen chin a\anga hma lam pan zel chungin, kan nunah ei tur tuihnai tak a lo awm a, Krista hmel mawi tak chu a lo par chhuah theihna turin nitin i insiam thar zel ang u.

Lalpa’n a thu kan han sawi te kan zaa tan mal minsawm sak rawh se. Amen.

Saron KTP Sports

Saron Branch KTP chuan kumin chhunga a thawh thumna atan Branch Sports an hmang.

He Branch Sport hi a thawh thumna leh kumin atana a kharna ni nghal a ni a. Intihsiakna chi hrang hrang hmangin Group 3-te an intihsiak ang.

Ni zan khan Quiz hmangin Group pahmumte an inel a, chu bakah Saron Branch KTP IDOL thlanna neih a ni a, Group tin atangin Mipa 2 leh Hmeichhia 2 theuh tel tura tih a nih laiin Upa P. Thanhawla Group atangin Hmeichhia pakhat chauh a tel thei a. Tichuan Mi 11 in inelna neiin Hollow Guiter nen Mizo Hla pakhat theuh an sa a. Idol Result hi November 2 zanah puan a ni ang.

Ni 30 zan hian Saron Kohhran Gospel Centenary Hall-ah Sports Indoor items neih chhunzawm leh a ni ang a, hetah hian Advertisement leh Short Play (Drama) hmangin Group tinte an inel leh ang. Short Play-ah hian KTP te incheina chungchang lam hawia intihsiak tur a ni.

Ni 1 Nov. 09 khian HIgh School Field-ah Sports hi neih chhunzawm a ni ang a, Football, Volley ball leh intihsiakna hlimawm tak tak hman a ni ang.

He Sports hi Ni 2 Nov. 2009 zan khian Ropui taka kharna hun  hman a ni ang. He hunah hian Kumin chhung zawnga Sports neih tawh zawng zawng khaikhawma a  result puan a ni ang. Intihsiaknaah hian Inkhawm kal thain Gold a keng tel bawk a, Kumin kum tluana KTP Inkhawma Group tinte inkhawm dan Percentage tha ber thlan a ni ang.

IOC Hnenah Larsap-in Lawmthu a Sawi – Hmeithai Assn. Hnenah Ambulance

India ram chhunga company lian deuh deuhte hian mipui mimir tan chhenfakawmna thui tak an nei \hin a, mipui vantlang mamawh pawh thil phal takin an ruahman \hin. India Oil Company (IOC) Ltd. chuan Mizoram Hmeithai Association (MHA) hnenah an hman tangkai atan TATA Sumo Ambulance an pe a, hemi hlanna inkhawm nimina MHA Residential School, Zonuama buatsaih chu Mizoram Governor Lt.Gen.(Rtd) M.M.Lakhera a hmanpui a, Chief Minister nupui Pi Lal Riliani pawh khual zahawm niin a tel bawk.

Governor chuan a ngenna tihlawhtlingtu IOC te chungah a lawmthu sawiin he ambulance hi \angkai taka mi chanhai leh mamawhten an hman a beisei thu a sawi a. He thilpek hlu tak enkawl zui zel hi a hautak hle dawn tih sawiin MHA te chu senso \ul ang ngaihtuah thiam turin a chah.

Khual zahawm, Indian Society for Tobacco & Health, Mizoram Chapter President, Pi Lal Riliani pawhin IOC leh MHA te chungah lawmthu a sawi a. Mizoram Hmeithai Association naupang chanhai leh mi retheite tana thawktu tlawmngai pawl \angkai tak an ni tiin kum 1998 atanga 2005 chhung pawh khan a thlawna inentirna vawi tamtak an buatsaih \hin a, hetianga thilpek hlu tak ambulance hial an dawng ta chu an hman tangkai ngei a beisei thu a sawi a ni. Sum harsatna avanga MHA ten hmeichhe naupang te hmakhua chauh an thawh mek thu sawi chhuakin Boys’ Hostel din theihna turin IOC thuneitute a ngensak bawk. Mizote zingah pasal sun hmeithai tam ber te chuan khawhar hnem nan zuk lek hmuam an ching thin tiin Pi Lal Riliani chuan hei hian mihringte chungah natna leh thil tha lo bak engmah thlen a nei lo zawk a ni, a ti.

IOC hmarchhak bialtu Pu A. Pandian, General Manager, NEISO, IOC chuan 1950 atang daih tawhin Mizoramah bul an tan tawh thu leh 1970 atangin ei rawngbawlna gas an pek tan thu a sawi a. Tunah hian LPG leh khawnvartuiah phei chuan Mizorama Oil Company awmchhun a ni, a ti. IOC Ltd chu 30 June 1959-a din tan a ni a, kumin an Golden Jubilee kuma an hlawkna atanga mipui vantlang mamawh tur thilpek an hlan thei chu a chhinchhiah tlak hle thu a sawi bawk.

Inkhawmah hian MHA President Pi Veronica K. Zatluangi chuan lawmthu sawiin hun hnuhnung a khar a ni. Mizoram Hmeithai Association hian hmeithai leh an fate chhawmdawl kawngah theihtawpin khawtlang rawng an bawl thin a. Kum 1995 atangin Rashtriya Gramin Vikas Nidhi hnuaiah hmeithai 168 te hnenah vawkvulh loan pek a ni tawh a, kum 1996 khan Pi Sonia Gandhi chuan kum 2 chhung puanthui leh typing zirna bul a tan sak tawh bawk. Ministry of Tribal Affairs, GOI te nen tangkawpin 1998 – 2005 chhung khan Mizoram hmun hrang hranga a thlawna damlo entirna an buatsaih a. Hemi tumah hian damlo mi 11000 te inentir niin thingtlang hmun kilkhawr tak tak atanga damlo mi 2500 lai Aizawl Civil Hospital-a enkawl tura hruai an ni. MHA Residential School, Zonuam-ah hian hmeichhe naupang chanhai 120 lai an enkawl mek bawk.

Mizoram Assembly Budget Session Tawp Ta – Official Resolution pakhat Leh Dan Siam thatna 2 Pass

Nimin khan Mizoram Legislative Assembly kum 2009-2010 budget inkhawm chu tlai dar 3:15 khan Speaker Pu R.Romawia chuan tiamchin awm lovin a titawp. Niminah hian budget lam pang hawi rorel a awm tawh lo a, dan pangngaiin zawhna leh chhanna hun a ni a, chumi zawhah official resolution pakhat an pass a, dan awm sa siam\hatna pahnih an pass bawk.

Pu P.C.Lalthanliana, Social Welfare Minister chuan sawrkar resolution, parliament dan siam, India ram pum (Jammu & Kashmir tiam lovin)-a hman tur ‘The Scheduled Tribe and Other Traditional Forest Dwellers (Recognition of Forest Rights) Act 2006″ Mizoramah pawh hman vena tur chu sawihona neih hnuah pass a ni a, he dan hi ni 31.12.2009 a\angin Mizoramah hman ve a ni dawn a ni.

He dan hi Scheduled Tribe leh hnam dang pipu chen a\anga ram hnuaia lo chengten an chenna rama ham\hatna leh chanvo an neihna tur leh hriatpuina a ni a.India parliament in hnihten an pass tawh, President of India pawhin remtihna a pek tawh a ni a. India ram puma hman tur ni mah se Mizoram-in a bika humhimna a neih India Constitution Article 371G anga Mizoram Assembly-in resolution pass-a an tihthluk a nih loh chuan Mizoramah hman theih loh tur tih zingah a tel avangin he dan Mizorama hmang ve tur chuan hetia resolution pass kher hi a ngai a ni.

Nimina inkhawmah hian a changtu Minister Pu J.H.Ro\huama putluh ‘The Mizoram Cooperative Societies (Amandment) Bill 2009’ chu pass a ni a. Heta lang sar chu State Level Cooperative Societies, Secondary leh Primary Cooperative Societies Chairman, Vice Chairman leh Directors of Board of Management Committee thlanna kum hnih zela neih tur leh an hum chhung kum 2 a nihna tur a ni. Hei hi Section 46 sub section (2) clause (a)-ah chuantir a ni. He danpui (principal Act)-a section 49 sub section (1)-a clause (a) leh (b) paih te, section 50 paih te, section 51 vlause (c) leh (d) paih te a ni a. Section 53-ah a chunga thlante term kum 2 a nihna tur dah luh a ni.

Section 54 sub section (2) paih a ni a, Section 98 clause (e) zawhah clause (f) leh (g) belh a ni a, Section 99 clause (d) leh (e) paih a ni. Section 122 sub section clause (a),(b) leh (C) chu thlak a ni a, Cooperative Bank Committee Member atana thlan/chuh thei lo turte sawina a ni.

Nimina inkhawmah hian ‘The Mizoram Municipalities (Amandment) Bill, 2009 a changtu Minister Pu Zodintluanga pulut chu chhutsual te a tam deuh nain tih dik turin pass a ni a. Section 29 lai siam\hat a ni. Hetah hian a langsar chu a hmaa ‘population’ tih sawi chian loh chu ‘last preceding census’ tiin hrilhfiah a ni a. Khawpui Municipallity nei thei chin singnga tih chu singkhatah tihhniam a ni. Urban Area chhunga Municipal Administration kalpui rem lo bik, e.g. Industrial Estate,etc.angte chu Municipal Area huam chhung ni mah sela tel theih loh turin 74th.Constitutional Amenment Act 1992 Article 243Q(1)-ah tarlan a nih clause thar belh a ni. Tin, district headquarters chauh Minicipal body nei thei tur anga tih chu population singkhat nei khawpui dangte pawhin an neih theih nan ‘town’ tih telh belh a ni.

Municipal Councillor atana mi thiam ruat theihna chu paih rawt a ni a, bialtu MP leh MLA chu member ni thei tura rawt a ni. Vice Chairman chu Chairman ang bawkin Councillor-te thlan tura tih a ni. Inthlannaah Electronic Voting Machine hman theihna dan belh a ni.